<> Skip to main content
40 የሚደርሱ ኢትዮጵያውያን በሳዑዲ ዐረቢያ በማቆያ ውስጥ ታግተዋል፡፡

በሳዑዲ ዐረቢያ ‹ሽኩል ከዲማ› 40 የሚደርሱ ኢትዮጵያውያን በማቆያ ውስጥ ታግተው እንደሚገኙ ለአብመድ አስታወቁ፡፡

No photo description available.

ባሕር ዳር፡ ግንቦት 03/2011ዓ.ም (አብመድ) በሳዑዲ ዐረቢያ ሪያድ አቅራቢያ በሚገኝ ሽኩል ከዲማ የሚባል አካባቢ 40 የሚደርሱ ኢትዮጵያውያን ደመወዛቸውን ተነጥቀው በማቆያ ውስጥ እንደሚገኙ ተናገሩ፡፡ ኢትዮጵያውያኑ ለአብመድ በስልክ እንደገለጹት እስከ 15 ወራት በካምፑ ውስጥ ተዘግተው የሚገኙና ደመወዛቸውን የተነጠቁ ዜጎች ጠያቂ አካል አላገኙም፤ በዚህም አንዳንዶቹ ለአዕምሮ ጤና ችግር ተጋልጠዋል፡፡

በሳዑዲ ዐረቢያ ሪያድ ለሚገኘው የኢትዮጵያ ኤምባሲ ተደጋጋሚ ቅሬታ ማቅረባቸውን የገለጹት ኢትዮጵያውያኑ መፍትሔ አለማግኘታቸውን ነው ያመለከቱት፡፡

ስለጉዳዩ መረጃ እንዲሰጡን ያነጋርናቸው የኢፌዴሪ የውጭ ጉዳይ ሚኒስቴር ቃል አቀባይ አቶ ነቢያት ጌታቸው በሳዑዲ ዐረቢያ በርካታ አካባቢዎች ኢትዮጵያውያን በሕግ ጥላስርና በማቆያ እንደሚገኙ በማመላከት መንግሥት ለማስፈታትና ለማስመለስ ጥረት እያደረገ መሆኑን ተናግረዋል፡፡ ከሰሞኑ በረመዳን ጾም ምክንያት ከተለቀቁት 1ሺህ 400 ኢትዮጵያውያን በተጨማሪ ትናንትም 290 ኢትዮጵያውያን ወደ ሀገራቸው እንዲገቡ መለቀቃቸውን አስታውቀዋል፡፡

በሽኩል ከዲማ የሚገኙትን ኢትዮጵያውያን በተመለከተም መረጃውን ከአብመድ እንዳገኙ የሪያድ ኤምባሲ እንዲከታተለው መደረጉን አረጋግጠዋል፡፡ ትኩረት ተሰጠውቶ ኢትዮጵያውያኑ ምላሽ እንዲያገኙ እየተሠራ እንደሆነም ገልጸዋል፡፡ አብመድ ከሪያድ የኢትዮጵያ ኤምባሲ መረጃ ለማግኘት ጥረት እያደረገ ነው፡፡

ዘጋቢ፡- አብርሃም በዕውቀት

Image
The website encountered an unexpected error. Please try again later.