<> Skip to main content
Submitted by admin on Sat, 05/25/2019 - 23:59

የሐዋሳ ከተማና ኢትዮጵያ ቡና ጨዋታ በዝናብ ምክንያት ተቋርጦ ነገ ሊቀጥል ነው፡፡

ባሕር ዳር፡ ግንቦት 17/2011ዓ.ም (አብመድ) የኢትዮጵያ ፕሪሚዬር ሊግ 26ኛ ሳምንት የዛሬ መርሀ-ግብሮች በተለያዩ ከተሞች ተካሂደዋል፡፡

የሊጉ መሪ ፋሲል ከነማ ወደ ሶዶ ተጉዞ በወላይታ ዲቻ 2ለ1 ተሸንፏል፤ ተከታዩ መቀሌ 70 እንደርታ ደግሞ ወደ ጂማ ተጉዞ ከጅማ አባ ጂፋር 2ለ2 በሆነ ውጤት ጨዋታውን አጠናቅቋል፡፡ ይህንን ተከትሎም ፋሲል ከነማና መቀሌ 70 እንደርታ በእኩል 49 ነጥብ ፕሪሚዬር ሊጉን እየመሩት ነው፤ ፋሲል ከነማ በግብ ልዩነት የደረጃ ሠንጠረዡ አናት ላይ ነው፡፡

ሦስተኛ ደረጃ ላይ የነበረው ሲዳማ ቡና ወራጅ ቀጠና ከሚገኘው ደቡብ ፖሊስ ጋር በሜዳው እየተጫወተ 70ኛው ደቂቃ ድረስ 2ለ2 አቻ ነው፡፡ በ46 ነጥብ 3ኛ ደረጃ ላይ የሚገኘው ሲዳማ ቡና ድል ከቀናው ከፋሲልና ከመቀሌ 70 እንደርታ እኩል 49 ነጥብ መሰብሰብ ይችላል፡፡

ደቡብ ፖሊስ ማሸነፍ ከቻለ ደግሞ ነጥቡን 28 በማድረስ ለጊዜውም ቢሆን ከወራጅ ቀጠናው የመውጣት ዕድል አለው፡፡ በእርግጥ መከላከያ ቀሪ ጨዋታውን ካሸነፈ ደቡብ ፖሊስ ወደ ወራጅ ቀጠናው የመመለስ ስጋቱ እንደተጠበቀ ነው፡፡

የሐዋሳ ከተማና ኢትዮጵያ ቡና ጨዋታ ግብ ሳይስተናገድበት በከባድ ዝናብ ምክንያት ተቋርጧል፤ ነገ ረፋድ 4፡00 ከቆመበት ደቂቃ ጀምሮ እንደሚቀጥልም ታውቋል፡፡

ምንጭ፡- የየቡድኖቹ እና የኢትዮጵያ እግር ኳስ ፌዴሬሽን ማኅበራዊ ገጽ

Image