<> Skip to main content
ቀዳማዊት እመቤት ዝናሽ ታያቸው 2ኛ ደረጃ ትምህርት ቤቶችን እያስገነቡ ነው፡፡

ቀዳማዊት እመቤት ዝናሽ ታያቸው ዋግ ኽምራ ብሄረሰብ አስተዳደር ላይ ሁለተኛ ደረጃ ትምህርት ቤት ሊያስገነቡ ነው።

ባሕር ዳር፡ ግንቦት 30/2011ዓ.ም (አብመድ) ቀዳማዊት እመቤት ዝናሽ ታያቸው በአማራ ክልል ዋግ ኽምራ ብሄረሰብ አስተዳደር ሰሃላ ሰየምት ወረዳ ፋፋ ቀበሌ ለሚገነባው ሁለተኛ ደረጃ ትምህርት ቤት ዛሬ የመሠረት ድንጋይ አስቀምጠዋል፡፡

Image may contain: 8 people, people smiling, people standing, mountain, outdoor and nature

የትምህርት ቤቶች ግንባታ ትውልድን በእውቀት፣ በፍቅር፣ በሰላምና በአንድነት ለማነጽ እንዲሚያግዝ ቀዳማዊት እመቤት ዝናሽ ተናግረዋል፡፡ በ20 ሚሊዮን ብር ወጪ እንደሚገነባ የታቀደው ትምህርት ቤቱ በሚቀጥለው ዓመት ተጠናቅቆ አገልግሎት እንደሚሰጥ ቀዳማዊ እመቤት ዝናሽ ገልጸዋል፡፡ ዛሬ የመሠረት ድንጋይ የተቀመጠለት ትምህርት ቤት ሥራ ሲጀመርበት ከምስራቅ በለሳ፣ ከዝቋላ፣ ከጃናሞራና ከሳህላ ሰየምት ወረዳዎች ከ 1ሺህ 500 በላይ ተማሪዎችን ማስተናገድ እንደሚችል ተገልጧል፡፡

ይህም የሁለተኛ ደረጃ ትምህርት ቤቶችን ለማግኘት የሚሄዱትን እስከ 50 ኪሎ ሜትር ርቀት ያስቀራል፤ ከ8ኛ ክፍል በኋላ ተማሪዎች እንዳያቋርጡና ያቋረጡትም የመማር ዕድል እንዲያገኙም ያደርጋል፡፡ ቀዳማዊት እመቤት ዝናሽ ታያቸው ከተለያዩ አገራትና ድርጅቶች ባሰባሰቡት ገንዘብ ትምህርት ቤቶችን እያስገነቡ ነው፡፡ በአማራ ክልል ብቻ በደቡብ ወሎ ዞን፣ ጦሰ ፈለና ፣ በጎንደር ከተማ - ሎዛ ማርያም አካባቢ፣ በሰሜን ጎንደር ዞን - ደባርቅ እና በዋግ ኽምራ ብሔረሰብ አሥተዳደር ፈፋ አጠቃላይ ሁለተኛ ደረጃ ትምህርት ቤቶችን እያስገነቡ መሆናቸውን የክልሉ ትምህርት ቢሮ አስታውቋል፡፡ በሶማሌ፣ በጋምቤላ እና በሌሎችም ክልሎች የሁለተኛ ደረጃ ትምህርት ቤቶችን ለማስገንባት ሥራዎችን ማስጀመራቸውም ይታወቃል፡፡

የአማራ ክልል ትምህርት ቢሮ ኃላፊ ዶክተር ይልቃል ከፋለ በበኩላቸው በክልሉ የሁለተኛ ደረጃ ትምህርት ቤት ሽፋን 47 በመቶ መሆኑን ገልፀዋል። ቀዳማዊት እመቤቷ ለትምህርት ቤቶች ግንባታ የሰጡት ትኩረት ሽፋኑን ለማሳደግ እንደሚያግዝም ነው የተናገሩት

በዋግ ኽምራ ብሔረሰብ አሥተዳደር ሰባት የዳስ ትምህርት ቤቶችና 324 የዳስ የመማሪያ ክፍሎች እንደሚገኙ ከትምህርት መምሪያው ያገኘነው መረጃ ያሳያል። የመማሪያ ክፍሎችንና ትምህርት ቤቶችን ሙሉ በሙሉ ደረጃቸውን የጠበቁ ለማድረግ የክልሉ መንግስት አቅዷል፤ ከሕዝቡ ጋርም በትብብር በመስራት ላይ ይገኛል።

በብሔረሰብ አሥተዳደሩ የዳስ ትምህርት ቤቶችን ቁጥር ለመቀነስ አትሌት ሻለቃ ሃይሌ ገብረ ስላሴ በራሱ ወጭ አንድ ትምህርት ቤት እያስገነባ ይገኛል፡፡ ከታላቁ ሩጫ በሚገኝ ገቢ ደግሞ ሁለት ትምህርት ቤቶችን ለማስገንባት ቃል መግባቱ ይታወሳል፡፡

በባለ ዓለምዬ እና በክፍሉ ሞገስ

Image