<> Skip to main content
‹‹ሁለት ዓመት ሙሉ ከጎኔ ለነበረው ደጋፊ ምሥጋና ማቅረብ እፈልጋለሁ፡፡››

‹‹ሁለት ዓመት ሙሉ ከጎኔ ለነበረው ደጋፊ ምሥጋና ማቅረብ እፈልጋለሁ፡፡›› አሰልጣኝ ጳውሎስ ጌታቸው

ባሕር ዳር፡ ሐምሌ 4/2011 ዓ.ም (አብመድ) የ2011ዓ.ም የኢትዮጵያ ፕሪሚዬር ሊግ ተጠናቅቋል፡፡ ውዝግብ የበዛበት የዘንድሮው የኢትዮጵያ ወንዶች እግር ኳስ ፕሪሚዬር ሊግ እስከ ማጠናቀቂያው 30ኛ ሳምንት ጨዋታ ድረስ ውዝግብ እና ግጭት ሳይለየው ነው የተጠናቀቀው፡፡

ፋሲል እና ባሕር ዳር ከነማ ቡድኖች በውድድር ዓመቱ 3ኛ እና 8ኛ በመሆን ያጠናቀቁ የአማራ ክልል ተወካይ ቡድኖች ናቸው፡፡ ‹‹የውድድር ዓመቱ ምን ይመስል ነበር? ምን ትምህርትስ ተገኘ? እና ለቀጣይስ ምን ሊሠራ ይገባል?›› ስንል ከቡድኖቹ አሰልጣኞች ጋር የስልክ ቆይታ አድርገናል፡፡ 

Image may contain: one or more people, crowd, stadium, sky and outdoor
በ2010 ዓ.ም ወደ ፕሪሚዬር ሊግ የተቀላቀለው የባሕር ዳር ከነማ እግር ኳስ ቡድን በ2011 ዓ.ም የውድድር ወቅት በተለይም በመጀመሪያው ግማሽ ዓመት ውድድሮች ባሳየው ብቃት የበርካቶችን ቀልብ ስቦ ነበር፡፡ ተደጋጋሚ የተጫዋቾች ጉዳት ያጋጠመው ቡድኑ በሁለተኛው ዙር ውድድር ግን የቀደመ አቋሙን ይዞ መቀጠል ተስኖት ተስተውሏል፡፡ በአንፃሩ ፋሲል ከነማ እስከ 30ኛው ሳምንት ውድድር ድረስ ዋንጫ የማንሳት ሰፊ ዕድል ይዞ እየመራ ነበር፡፡

‹‹ቡድኑን በአሰልጣኝነት ስቀበል በ2011 ዓ.ም ከፕሪሚዬር ሊጉ እንዲቆይ ማድረግን ዓላማ አድርጌ ነበር የተቀላቀልኩት›› ያሉት የባሕር ዳር ከነማ አሰልጣኝ ጳውሎስ ጌታቸው በውድድር ዓመቱ በነበራቸው አፈፃፀም ደስተኛ ነበርኩ ነው ያሉት፡፡

‹‹ሁለት ዓመታትን ያለዕረፍት የተጫወቱ ተጫዋቾች እና በውድድር ዓመቱ ሁሉ አብረውኝ የዘለቁ ደጋፊዎች ከቡድኑ መሪዎች ጋር በመሆን ጥሩ የውድድር ጊዜ እንዳሳልፍ አድርገውኛል›› ያሉት አሰልጣኝ ጳውሎስ በውድድር ዓመቱ የመጀመሪያ አጋማሽ የውድድር ወቅት ያሳዩትን የጨዋታ ብቃት በሁለተኛው ዙር ለመድገም ተደጋጋሚ የተጫዋቾች ጉዳት ዋጋ እንዳስከፈላቸው ተናግረዋል፡፡

No photo description available.

‹‹ፕሪሚዬር ሊጉ ኳስ መሆኑ እስኪረሳ ድረስ ፖለቲካዊ ቅርፅ ይዞ ነበር›› ያሉት አሰልጣኝ ጳውሎስ ጌታቸው ያለፈውን መውቀስ ሳይሆን አስተማሪ ሆኖ እንዲቀር መሥራት እንደሚጠበቅም ተናግረዋል፡፡ ‹‹የፕሪሚዬር ሊጉ ተሳታፊ አስራ ስድስቱም ቡድኖች በፌዴሬሽኑ ፊት እኩል መታዬት አለባቸው፤ ለዳኞች ከፍተኛ የሆነ ጥበቃና ከለላ ሊኖራቸው ይገባል›› ያሉት አሰልጣኙ አሰልጣኞች፣ የቡድን መሪዎች እና ተጫዋቾች ሕዝብን ለብጥብጥ ከማነሳሳት መታቀብ እንዳባቸውም መክረዋል፡፡

በ2011 ዓ.ም የፕሪሚዬር ሊጉ ውድድሮች ላይ ‹‹የታየው የፌዴሬሽኑ ውሳኔ ወጥነት የጎደለው እና የወሰነውን ውሳኔ የማስፈፀም አቅም ያጣበት ነበር›› ያሉት አሰልጣኝ ጳውሎስ ፌዴሬሽኑ የ2012 ዓ.ም ውድድሮች ከመጀመራቸው በፊት እራሱን በሚገባ ሊመረምር እንደሚገባም አሳስበዋል፡፡

አሰልጣኝ ጳውሎስ እንዳሉት ባሕር ዳር ከነማ የሕዝብ ቡድን ነው፤ ደጋፊዎቹም እንደ ዓይናቸው ብሌን የሚንከባከቡት ዓርማ ነው፤ ችግሮች ሲኖሩ ቀርቦ በመነጋገር መፍታት ይጠበቃል፡፡ ‹‹ባለፉት ሁለት ዓመታት ከጎኔ ለነበረው ደጋፊ እና የክለቡ አመራሮች ምሥጋና ማቅረብ እፈልጋለሁ›› ብለዋል፡፡

የፋሲል ከነማን ዓመታዊ አፈፃፀም ለመጠየቅ ያደረግነው ተደጋጋሚ ሙከራ ለጊዜው አልተሳካም፤ በቀጣይ የቡድኑን አሰልጣኝ አነጋግረን ይዘን ለመቅረብ ጥረት እናደርጋለን፡፡

ዘጋቢ፡- ታዘብ አራጋው

Image