<> Skip to main content
በኢትዮጵያ ሊተከል ከታቀደው ችግኝ ግማሹ የአማራ ክልል ድርሻ ነው፡፡

 

የችግኝ አተካከል ሥራው ከሳይንሱ እንዳይወጣ ጥንቃቄ እንዲደረግ ተጠየቀ፡፡

በ2011 ዓ.ም የክረምት ወቅት 4 ቢሊዮን ችግኞችን በኢትዮጵያ ለመትከል እቅድ ተይዟል፡፡ በአማራ ክልል ደግሞ 1 ነጥብ 6 ቢሊዮን ችግኝ ተዘጋጅቶ እየተተከለ እንደሆነ ግብርና ቢሮው ገልጿል፡፡ ሐምሌ 22/2011 ዓ.ም ደግሞ በአንድ ቀን 200 ሚሊዮን ችግኝ በመትከል የዓለምን ክብረ ወሰን ለመውሰድ ታቅዳል፤ ከዚህ ውስጥ 100 ሚሊዮኑ በአማራ ክልል ነው የሚተከሉት፡፡

Image may contain: plant, flower, outdoor and nature

ችግኝ መትከል ብቻ ውጤት አያመጣምና ሙሉ በሙሉ የማይጸድቅ ከሆነ የገንዘብ፣ የጊዜ እና የጉልበት ብክነት ይፈጠራል፡፡ የችግኝ አተካከላችን ሳይንሳዊ ካልሆነ ዓመቱን ሙሉ የተለፋበትን ሥራ ዋጋ ማሳጣት ይሆናል፡፡ ችግኝና መትከያ ጉድጓድ ማዘጋጀት፣ ኅብረተሰቡ ለምን እንደሚተክል ማስገንዘብ ቅድሚያ የሚከናወኑ ተግባራት በመሆናቸው አተካከላችን ሂደቱን በተከተለ መንገድ እንዲሆን ነው የግብርና ቢሮው ባለሙያዎቹ የመከሩት፡፡

ከአማራ ክልል ግብርና ቢሮ የተፈጥሮ ሀብት ልማትና ጥበቃ ዳይሬክተር አቶ ጌታቸው እንግዳየሁ ስለ ችግኝ አተካከል በየጊዜው ለኅብረተሰቡ ትምህርት እንደሚሰጥ ነው የነገሩን፡፡ በተለይም በተከላ ጊዜ በስፋት ትምህርቱ ይሰጣል፡፡ ይሁን እንጂ ተግባራዊ ሳይደረጉ በመቅረታቸው የማይጸድቁ ችግኞች ብዙ ናቸው፡፡ በአንዳንድ ሰዎች ዘንድ ችግኝ ከተተከለ ብቻ እንደሚጸድቅ አድርጎ የማሰብ ችግር ይስተዋላልም ነው ያሉት፡፡ ህጻን ተወልዶ ሙቀት እንዲያገኝ ከእናቱ እቅፍ ገብቶ እንክብካቤ ይደረግለታል፡፡ ይህ ካልሆነ ግን በህጻኑ ላይ ችግር ይፈጠራል፡፡ እንደ ህጻን ሁሉ ችግኝም ለማደግ የሚጓጓ ህይወት ያለው በመሆኑ ከተከላ በኋላ ተገቢ እንክብካቤ እንዲደረግለት ይፈልጋል፡፡

ስለሆነም አንድ ችግኝ በምንተክልበት ወቅት ስሩ እንዳይታጠፍ ከፍተኛ ጥንቃቄ ማድረግ፣መትከያ ጉድጓድ ሲቆፈር ደግሞ ከችግኙ ውፍረት ሦስት እጥፍ እንዲሆን አድርጎ ማዘጋጀት፣ ችግኝ በሚተከልበት ጊዜ ግንዱ ከመሬት እኩል መሆኑን ማረጋገጥና የጉድጓዱ ርዝመት ከችግኙ ከበለጠ የችግኙ ግንድ ከመሬት እኩል እስኪሆን ድረስ ጉድጓዱን አፈር መሙላት ያስፈልጋል ብለዋል አቶ ጌታቸው፡፡

 ከዚህ በተጨማሪ ችግኙ 90 ዲግሪ ቀጥ ብሎ መቆሙን እርግጠኛ መሆን ያስፈልጋል፡፡ ጉድጓዱ በመሬቱ ልክ አፈር ካልተሞላ ውኃ ቋጥሮ ችግኙ እንዲደርቅ ስለሚያደርገው በጥንቃቄ አፈር መሞላቱን ማረጋገጥም ተገቢ ነው፡፡ ችግኝ መትከል ብቻውን ግብ አይደለም ያሉት ዳይሬክተሩ የመጨረሻ ግቡ የፅድቀት መጠኑን እንዲጨምር ማድረግ እንደሆነ አሳስበዋል፡፡

ችግኝ የተተከለበትን ቦታ ከእንስሳትና ከሰው ንክኪ ነጻ ማድረግ እና በባለቤትነት ይዞ መንከባከብም በምክረ ሀሳቡ ተካትቷል፡፡ የመሬቱ እርጥበት ሳይደርቅ መኮትኮትና ማረም ተገቢ እንደሆነም ባለሙያው መክረዋል፡፡ 

ዘጋቢ፡- ደጀኔ በቀለ

 

Image
The website encountered an unexpected error. Please try again later.