<> Skip to main content
ደብረ ብርሃን የሰላም መለያ እንድትሆን ለማድረግ እየተሠራ ነው፡፡

ደብረ ብርሃን ከተማ የሰላም መለያ ‹‹ብራንድ›› እንድታገኝ በማድረግ የኢንቨስትመንት እንቅስቃሴውን ለማሳደግ እየተሰራ መሆኑ ታውቋል፡፡

Image may contain: sky and outdoor

ደብረ ብርሃን በኢንቨስትመንት እንቅስቃሴያቸው ከሚታወቁ የኢትዮጵያ ከተሞች አንዷ ናት፡፡ ባለፈው በጀት ዓመት ወደ ከተማዋ 2 ቢሊዮን ብር ካፒታል ያላቸው 120 ባለሀብቶችን ለመሳብ ታቅዶ ነበር፡፡ የከተማዋ ተቀዳሚ ምክትል ከንቲባ ደስታ አንዳርጌ ለአብመድ እንደገለጹት በበጀት ዓመቱ ከ20 ቢሊዮን ብር በላይ ካፒታል ያስመዘገቡ ባለሀብቶች ወደ ኢንቨስትመንት ገብተዋል፡፡ ይህም የዕቅዱ ከ10 እጥፍ በላይ ነው፡፡

 አብዛኛዎቹም ከዚህ ቀደሙ በተለየ ፍጥነት የግንባታ ሥራ ጀምረዋል ነው የተባለው፡፡ ሙሉ በሙሉ ሥራ ሲጀምሩም ለ 3 ሺህ 800 ወጣቶች ቋሚ የሥራ ዕድል እንዲፈጥሩ ታቅዷል፡፡ የተሰማሩትም በአግሮ ፕሮሰሲንግ፣ በጨርቃጨርቅ፣ በመኪና መገጣጠሚያ እና በሌሎችም ሀገራዊ ፋይዳ ባላቸው ዘርፎች መሆኑን አቶ ደስታ ገልጸዋል፡፡

 

እንደ ተቀዳሚ ምክትል ከንቲባው ገለጻ አስተማማኝ ሰላም መኖሩ ለከተማዋ ኢንቨስትመንት ዕድገት ትልቁን ድርሻ ይዟል፡፡ ወጣቶችና አጠቃላይ የከተማዋ ኅብረተሰብ ለሰላም ቅድሚያ በመስጠታቸው የሀገር ውስጥም ሆኑ የውጭ ሀገራት ባለሀብቶች መዋዕለ ንዋያቸውን ለማፍሰስ ምርጫቸው እያደረጓት መሆኑንም ነው የተናገሩት፡፡ ኅብረተሰቡ የኢንቨስትመንት ቦታዎችን ‹‹የኔ ናቸው›› ብሎ መጠበቁ የሚያስገኝለትን ጠቀሜታ ተረድቶ በተግባር እያሳዬ መሆኑም ሌላው ምክንያት ሆኖ ተጠቅሷል፡፡

በመሆኑም ሰዎች ስለደብረ ብርሃን ሲያስቡ በአዕምሯው ቀድሞ የሚመጣው ‹‹ሰላም!›› የሚለው ቃል እንዲሆን እንደሚሰሩ ነው አቶ ደስታ የተናገሩት፡፡ ይህ ደግሞ ከተማዋ ይበልጥ የኢንዱስትሪ ማዕከል እንደትሆንና ኅብረተሰቡ የሚያገኘው ጥቅምም እንዲያድግ ያደርጋል፡፡

የኢንዱስትሪዎችን መስፋፋት ተከትሎ ነዋሪዎቹ የሚያገኙትን ጥቅም ማሳደግ ላይ በትኩረት እንደሚሰሩም ነግረውናል፡፡ ይህም የሥራ ዕድል ከማግኘት ባለፈ ለሥራቸው ተገቢ ክፍያ እንዲያገኙ ማድረግን ይጨምራል ነው ያሉት አቶ ደስታ፡፡

ደብረ ብርሃን የሰላም መለያ ‹‹ብራንድ›› እንድታገኝ በማድረግና ኅብረተሰቡ ለኢንዱስትሪዎች ያለውን የኔነት ስሜት ይበልጥ በማሳደግ ተጠቃሚነቱን ከፍ ለማድረግ ትኩረት እንደሚሰጥም ተቀዳሚ ምክትል ከንቲባው ገልጸዋል፡፡

 ዘጋቢ፡- አስማማው በቀለ

 

Image