<> Skip to main content
ለክልሉ የልማት እና የኢንቨስትመንት እንቅስቃሴ ችግሮች

ለክልሉ የልማት እና የኢንቨስትመንት እንቅስቃሴ ችግሮች ምላሽ ለመስጠት እንደሚሰሩ የሥራ ኃላፊዎች ተናገሩ፡፡

ባሕር ዳር፡ ሐምሌ 28/2011 ዓ.ም (አብመድ) የአማራ ክልል የልማት እና የኢንቨስትመንት እንቅስቃሴዎች እና ችግሮችን የተመለከተ ጉብኝት ተካሂዷል፡፡

የአማራ ክልል ርዕሰ መስተዳድር ተመሥገን ጥሩነህ፣ የፌዴራል እና የክልል ከፍተኛ የሥራ ኃላፊዎች ከሰሞኑ በክልሉ የተለያዩ አካባቢዎች በመንቀሳቀስ የልማትና የኢንቨስትመንት ስራዎችን ጎብኝተዋል፡፡ በደቡብ ጎንደር ዞን የደብረ ታቦር ከተማን የኢንቨስትመንት እንቅስቃሴ እና የዋንዛየ ፍል ውሃን የጎበኙት ልዑካኑ በዞኑ ውስጥ የመሠረተ ልማት ችግር በተለይም የመብራት፣ የውሃ እና የቴሌኮም አገልግሎት ችግሮች መኖራቸውን ተመልክተዋል፡፡ በርካታ ባለሀብቶች ወደ አካባቢው ገብተው እንዲያለሙ ፈቃድ ቢያገኙም በመሠረተ ልማት ችግር ሥራ አለመጀመራቸው ታውቋል፡፡

2

የባሕር ዳር እና አካባቢዋን የኢንቨስትመንት እና የልማት እንቅስቃሴዎችን በጎበኙበት ወቅትም የኤሌክትሪክ ኃይል፣ የመንገድ፣ የውሃ፣ የመሥሪያ ቦታ፣ የውጭ ምንዛሬ እና የስልክ አገልግሎት ጥያቄዎች ከባለሀብቶቹ ቀርበዋል፡፡
ከጉብኝቱ በኋላ ከጋዜጠኞች ለቀረቡላቸው ጥያቄዎች ምላሽ የሰጡት የኢትዮ ቴሌኮም ዋና ሥራ አስፈፃሚ ወይዘሪት ፍሬህይዎት ታምሩ እና የኤሌክትሪክ ሃይል ዋና ስራ አስፈፃሚ ዶክተር አብርሃም በላይ ችግሮቹን ወደ ሕዝቡ ቀርበው ማየታቸው ፈጣን ምላሽ ለመስጠት የሚያስችል ግብዓት እንዳስገኘላቸው ተናግረዋል፡፡

3

‹‹በሀገሪቱ ድንበር አካባቢ የጎረቤት ሀገር ሲም ካርድ ሲሸጥ መመልከት በአካባቢው በሚገባው ልክ አለመሥራታችንን የሚያመላክት ነው›› ያሉት ወይዘሪት ፍሬህይዎት ችግሩን በአፋጣኝ ለመፍታት ከዋናው መሥሪያ ቤት ባለሙያዎች መጥተው እንዲሰሩ እየተደረገ መሆኑን አስታውቀዋል፡፡ መተማ አካባቢ በነበራቸው የሥራ ጉብኝት የሱዳን ሲም ካርድ ድንበር አካባቢ ሲሸጥ መመልከታቸውንና ዋና ሥራ አስፈጻሚዋ መፍትሔ እንደሚሰጡት መናገራቸውን መዘገባችን ይታወሳል፡፡

4

በሌሎች አካባቢዎች በተለይም በደቡብ ጎንደር ዞን 41 ቀበሌዎች ሙሉ በሙሉ የስልክ አገልግሎት እንደማያገኙ ባለሙያዎች ባደረጉት አሰሳ አረጋግጠዋል፡፡ “ይህን እና በአጠቃላይ የክልሉን የኢንቨስትመንት እና የልማት እንቅስቃሴዎች ለመደገፍ መሠረተ ልማትን የምናስተዳድር ተቋማት ለችግሩ የሚመጥን የአጭር ጊዜ እና ዘላቂ መፍትሄ እናዘጋጃለን” ነው ያሉት ዋና ሥራ አስፈፃሚዋ፡፡ 
ርዕሰ መስተዳድሩ እና ልዑካቸው ጉብኝት ባደረጉባቸው ሁሉም አካባቢዎች የችግሩ መጠን ይለያይ እንጂ የኤሌክትሪክ ኃይል እጥረት ለክልሉ ልማት እና ኢንቨስትመንት ዋነኛ ችግር መሆኑ ቀርቧል፡፡ ጉዳዩን በተመለከተ ምላሽ የሰጡት የኤሌክትሪክ ኃይል ዋና ሥራ አስፈፃሚ ዶክተር አብርሃም በላይ የችግሩን አሳሳቢነት በቅርበት ማየት እንደቻሉ ገልጸዋል፤ ከቻይና መንግስት ጋር እየተወሰደ ባለው ውል የበርካታ አካባቢዎች የኃይል አቅርቦት ችግር እንደሚቀረፍም ተናግረዋል፡፡

5

በደቡብ ጎንደር አካባቢ ያለው የኃይል ችግር የከፋ መሆኑን የተናገሩት ዋና ሥራ አስፈፃሚው ‹‹የባህር ዳር- ወረታ- ወልዲያ ‹‹ስቴሽን›› ሲጠናቀቅ ችግሩ ሙሉ በሙሉ የሚቀረፍ ይሆናል፤ እስከዚያ ድረስ ግን አፋጣኝ ምላሽ ለሚያስፈልጋቸው የአጭር ጊዜ መፍትሔ እንሰጣለን›› ብለዋል ዶክተር አብርሃም፡፡ 
የአማራ ክልል ርዕሰ መስተዳድር ተመሥገን ጥሩነህ ለክልሉ የልማትና የኢንቨስትመንትእንቅስቃሴዎች መሰናክል የሆኑ የመሠረተ ልማት ጥያቄዎች በአፋጣኝ ምላሽ ሊሰጣቸው እንደሚገባ አሳስበዋል፡፡ በፌዴራል ደረጃ ያሉና መሠረተ ልማትን የሚያስተዳድሩ ተቋማት የሥራ ኃላፊዎች በጉብኝቱ እንዲካተቱ የተደረገውም የችግሩን አሳሳቢነት እንዲያዩትና መፍትሔ እንዲሰጡ ታስቦ እንደሆነ ገልፀዋል፡፡

6

“አንዳንድ አካባቢዎች ላይ የሚስተዋለው የመሠረተ ልማት ችግር የከፋ ነው፤ በመሆኑም ይህንን የሚመጥንና የአካባቢውን የልማት እንቅስቃሴ የሚደግፍ አፋጣኝ መፍትሔ ለመስጠት ተዘጋጅተናል” ነው ያሉት ርዕሰ መስተዳድሩ፡፡ በቀጣይም በተለያዩ አካባቢዎች በመዘዋወር የልማትና የኢንቨስትመንት ቦታዎችን በመጎብኘት ለችግሮቻቸው መፍትሔ ለማፈላለግ እንደሚሰሩ ርዕሰ መስተዳድሩ ገልፀዋል፡፡

ዘጋቢ፡- ታዘብ አራጋው

Image
The website encountered an unexpected error. Please try again later.