<> Skip to main content
ባንኩ ችግሩን በሁለት ቀናት ውስጥ እፈታለሁ አለ፡፡

ባንኩ ያጋጠመውን የ‹‹ሲስተም›› ችግር ለመፍታት ጥረት እያደረገ መሆኑን አስታወቀ፡፡

የኢትዮጵያ ንግድ ባንክ የገጠመው ‹‹የሲስተም›› ችግር በሁለት ቀናት ውስጥ ሙሉ በሙሉ ሊፈታ እንደሚችልም አስታውቋል፡፡

የኢትዮጵያ ንግድ  ባንክ ላለፉት ሁለት ቀናት የ‹‹ሲስተም›› ብልሽት አጋጥሞታል፡፡ በዚህም የተነሳ ደንበኞች ለእንግልት መዳረጋቸውን ተናግረዋል፡፡ የአማራ ብዙኃን መገናኛ ድርጅትም የደንበኞችን መጉላላት ታዝቧል፡፡

እንደ ሀገር በየወቅቱ እየተፈጠረ ባለው የ‹‹ኔት ወርክ››  እና የኤሌክትሪክ ኃይል መቆራረጥ ባንኩ ለችግር እየተጋለጠ መሆኑን የኢትዮጵያ ንግድ ባንክ የሕዝብ ግንኙነት ኃላፊ አቶ የአብሥራ ከበደ ለአብመድ ገልጸዋል፡፡ ይህም ደንበኞቹን ለእንግልት እየዳረገበት እንደሆነም ነው አቶ የአብሥራ ያስታወቁት፡፡
 

ለሁለት ቀናት በባንኩ ደንበኞች ላይ የተፈጠረው መጉላላት ምክንያቱ የ‹‹ሲስተም›› ብልሽ እንደሆነ የገለጹት የሕዝብ ግንኙነት ኃላፊው ችግሩ ከተከሠተበት ጊዜ ጀምሮ በፍጥነት ለመፍታት ጥረት እየተደረገ እንደሆነ ነው የተናገሩት፡፡

ባንኩ በመላው ሀገሪቱ ከ 1ሺህ 450 በላይ ቅርንጫፎች አሉት ተብሏል፡፡ ደንበኞች በበዙ ቁጥር ችግሩ ስለሚኖር ይህንን የሚፈታ ዘመናዊ ቴክኖሎጂ ወደ ሥራ ለማስገባት በእቅድ እየተሠራ እንደሆነ ነው ባንኩ ለአብመድ ያስታወቀው፡፡

 ችግሩ ዛሬ ወይም ነገ ሙሉ በሙሉ ሊፈታ እንደሚችልም አቶ የአብሥራ አስታውቀዋል፤ ለተፈጠረው ችግርም ይቅርታ  ጠይቀዋል፡፡ 
 

በባሕር ዳር እና አከባቢዋ ከኢትዮጵያ ንግድ ባንክ ውጭ ያሉ ሌሎች ባንኮች አገልግሎታቸው እንዳልተቋረጠ አብመድ ተመልክቷል፡፡  የኢትዮጵያ ንግድ ባንክ ደንበኞችም በ‹‹ኤቲኤም›› ካርድ ከሌሎች ባንኮች ገንዘብ እያወጡ  ሲገለገሉ ታዝቧል፡፡  ልዩነቱ እንዴት እንደተፈጠረ የተጠየቁት የሕዝብ ግንኙነት ኃላፊው ‹‹ሌሎች ባንኮች እንደሚሠሩ አላውቅም››  የሚል ሀሳብ ነው የሰጡት፡፡

ደንበኞች ችግሩ እስኪፈታ በትዕግሥት እንዲጠብቁም ባንኩ ጠይቋል፡፡

ዘጋቢ፡- ግርማ ተጫነ

 

Image
The website encountered an unexpected error. Please try again later.