<> Skip to main content
‹‹ትራንስፎርመሮች›› ለምን ወድቀው ለብልሽት ይዳረጋሉ?

ኅብረተሰቡ ሰፊ የመብራት ኃይል ጥያቄ እያነሳ ባለበት በዚህ ወቅት ‹‹ትራንስፎርመሮች›› ለምን ወድቀው ለብልሽት ይዳረጋሉ?

ባሕር ዳር፡ ሐምሌ 29/2011 ዓ.ም (አብመድ) በንብረቶች ላይ እየደረሰ ያለውን ችግር ለመቅረፍ የማከማቻ ግንባታ መጀመሩን በኢትዮጵያ ኤሌክትሪክ አገልግሎት የሰሜን ምዕራብ ዲስትሪክት አስታውቋል፡፡

Image may contain: plant, flower, tree and outdoor

በተለያዩ አካባቢዎች በሰው ሰራሽና በተፈጥሮ አደጋ ምክንያት አገልግሎት መስጠት ያልቻሉ ትራንስፈርመሮችን በአግባቡ መሰብሰብ ሲገባው ለፀሐይ፣ ለዝናብ፣ ለጎርፍ፣ ለአረምና ለቆሻሻ ተጋላጭ ሆነው ይታያሉ፡፡ በአግባቡ ተሰብስበው ጥቅም እንዲሰጡ ከማድረግ ይልቅ የሀገር ንብረት እየባከነ መሆኑን አብመድ በክልሉ የተለያዩ አካባቢዎች ተዘዋውሮ ያነጋገራቸው ነዋሪዎች አስተያዬት ሰጥተዋል፡፡

ንብረቶቹ ተጠግነው ሥራ ላይ እንዲውሉም ነዋሪዎቹ ጠይቀዋል፡፡ በኢትዮጵያ ኤሌክትሪክ አገልግሎት የሰሜን ምዕራብ ዲስትሪክት ኃላፊነቱን መወጣት እንደነበረበትም ነው የተናገሩት፡፡ በአንዳንድ አካባቢዎች በብዛት ተከማችተው ስለሚገኙ ለመንገድ አስቸጋሪ እንደሆኑም አስተያዬት ሰጪዎች ነግረውናል፡፡ አብመድ በተለያዩ ቦታዎች እንደተመለከተው ያገለገሉ ‹‹ትራንስፎርመሮች›› በተገቢው ቦታ ባለመከማቸታቸው ለዝገት እየተጋለጡ ነው፡፡ በባሕር ዳር ከተማ ቴክስታይል አካባቢ የወዳደቁት ደግሞ በርከት ያሉ ናቸው፡፡ በየአካባቢው የመብራት መቆራረጥ ችግር እና የኤሌክትሪክ ኃይል ጥያቄ እያለ ንብረቶች ቆሻሻ ውስጥ ተከማችተው መበላሸት ስለሌለባቸው ተቋሙ የሚጠገኑትን ቶሎ በማስጠገን ችግሮችን ማቃለል እንዳለበትም ነው ያሳሰቡት፡፡

የኢንጂነሪንግ ተማሪው አደለኝ ሞገስ ደግሞ ‹‹ንብረትን እንደዚህ ለጉዳት በሚያጋልጥ መንገድ ማስቀመጥ ተገቢ አይደለም፤ ንብረቶቹ በውጭ ምንዛሪ ተገዝተው ሀገር ውስጥ እንዲገቡ የሚደረጉት የኃይል አቅርቦት ችግሩን ለመቀነስ ነው፤ ጊዜ ሳይወሰድ መፍትሔ ሊሰጠው ይገባል›› ነው ያለው፡፡ ለብልሽት እየተዳረጉ ያሉት ‹‹ትራንስፈርመሮች›› ቢጠገኑ የመብራት መቆራረጥ ችግሩን ለመቀነስ ሊያግዙ ይችሉ እንደነበርም ነው ተማሪ አደለኝ አስተያዬት የሰጠው፡፡

በኢትዮጵያ ኤሌክትሪክ አገልግሎት የሰሜን ምዕራብ ዲስትሪክት የኮሚዩኒኬሽን ኃላፊ አቶ ወንድሙ ገብሬ የትራንስፎርመሮቹ ማከማቻ ቦታ ተገቢ እንዳልሆነ ታውቆ መፍትሔ ለመስጠት እየተሰራ ነው ብለዋል፡፡ ንብረቶቹ አገልግሎት መስጠት ያቆሙ፤ ነገር ግን ጥገና ተደርጎላቸው ለአገልግሎት እስኪውሉ ድረስ ሜዳ ላይ የቆዩ መሆኑንም ተናግረዋል፡፡ ባለፈው በጀት ዓመት 230 የተበላሹ ትራንስፎርመሮች እንዲጠገኑ በማድረግ ለአገልግሎት እንዲበቁ መደረጋቸውን የተናገሩት ኃላፊው በተያዘው በጀት ዓመትም 200 የሚሆኑትን ለማስጠገን እንደታሰበ ገልጸዋል፡፡

በቀላሉ ሊጠገኑ የሚችሉትን በማስጠገን፣ አገልግሎት መስጠት የማይችሉትን ደግሞ ተጠግነው ሊሰሩ ለሚችሉት ማሟያ በማድረግ ጥቅም ላይ እንደሚያውሏቸውም ነው አቶ ወንድሙ ተናገሩት፡፡ በመሆኑም በባለሙያዎች ተለይተው ከተጠገኑ በኋላ ለአገልግሎት ዝግጁ እንደሚደረጉ አስረድተዋል፡፡ ለማስጠገን የሚደረግበት ሂደት ውጣ ውረድ የበዛበት መሆኑ ደግሞ የንብረቶቹ ክምችት እንዲጨምር መንስኤ እንደሆነ ነው አቶ ወንድሙ የገለጹት፡፡

ትራንስፎርመሮችን የሚጭኑ ተሽከርካሪዎች ሜዳ ላይ ማስቀመጣቸውም ለብልሽቱ ሌላው ምክንያት ሆኖ ቀርቧል፡፡ ችግሩን ለመፍታትም ከባሕር ዳር ከተማ አስተዳደር የማከማቻ መገንቢያ ቦታ በመረከብ ግንባታው እንደተጀመረ ነግረውናል፡፡

ዘጋቢ፡- ብሩክ ተሾመ

Image
The website encountered an unexpected error. Please try again later.