<> Skip to main content
ፍርድ ቤቱ መርማሪ ፖሊስ ያቀረበውን የ14 ቀናት ጥያቄ ውድቅ አደረገ፡፡

 

ባሕር ዳር፡ ሐምሌ 29/2011 ዓ.ም (አብመድ) የባሕር ዳር ከተማ ወረዳ ፍርድ ቤት የእነ ብርጋዲየር ጀነራል ተፈራ ማሞን ጉዳይ ዛሬ ከሰዓት በኋላ ተመልክቷል፡፡

Image may contain: text

በእነ ብርጋዲየር ጀነራል ተፈራ ማሞ መዝገብ የተከሰሱ 53 ተጠርጣሪዎችን ጉዳይ ነው ፍርድ ቤቱ ዛሬ ከሰዓት በኋላ የተመለከተው፡፡ መርማሪ ፖሊስ ከሰኔ 15ቱ ጥቃት ጋር በተያያዘ የ28 ሰወችን ማስረጃ መሰብሰቡን አስታውቋል፡፡ ይሁን እንጂ በተለያዩ ምክንያቶች ከፊል ምስክሮች ስላልተገኙ የምርመራ ቡድኑ ባሉበት ቦታ እያፈላለገ መሆኑን ለፍርድ ቤቱ ገልጿል፡፡ የቴክኒክ እና የሰነድ ማስረጃዎች ውጤታቸው ከፌዴራል የፎረንሲክ ምርመራ እና የኢትዮ ቴሌኮም የስልክ የምርመራ ውጤት ያልደረሱ በመሆኑ መርማሪ ፖሊስ ተጨማሪ የ14 ቀናት የጊዜ ቀጠሮ ጠይቋል፡፡

የተጠርጣሪዎች ጠበቆች ምስክር ከተገኘ እንጂ ካልተገኘ የጊዜ ቀጠሮ መጠየቁ ተገቢ አይደለም በማለት ጥያቄውን ተቃውመዋል፡፡ ተቋማቱ ማዕከላዊነትና ምስጢራዊነት የሚጠበቅባቸው በመሆናቸው ‹‹ፌዴራል የፎረንሲክ እና የኢትዮ ቴሌኮም የስልክ ምርመራ ውጤት አልተጠናቀቀም ቢባል እንኳን ተጨማሪ የጊዜ ቀጠሮ ይሰጠን ለማለት በቂ ምክንያት አይደሉም›› ብለዋል ጠበቆቹ፡፡ ቀሩ ተባሉት የቴክኒክና የሰነድ ማስረጃዎች ከሰው ምስክሮች ጎን ለጎን የሚታዩ እንጂ ተጨማሪ የጊዜ ቀጠሮ የሚያስፈልጋቸው አይደሉም ሲሊም ነው የጠየቁት፡፡

የባሕር ዳር ከተማ ወረዳ ፍርድ ቤትም መርማሪ ፖሊስ ያቀረባቸው ምክንያቶች ተጨማሪ ቀነ ቀጠሮ ለመስጠት በቂ አይደሉም በማለት ጥያቄውን ውድቅ አድርጎታል፡፡ እስከ ነሀሴ 13/2011 ድረስ ክስ እንዲመሰረትም ትዕዛዝ ሰጥቷል፡፡

ዘጋቢ፡- ደጀኔ በቀለ

Image