<> Skip to main content
በአስቸጋሪ ሁኔታ ውስጥ ያሉትን ወገኖች በመርዳት በዓሉን ማክበር ይገባል፡፡

በአስቸጋሪ ሁኔታ ውስጥ ያሉትን ወገኖች በመርዳት በዓሉን ማክበር እንደሚገባ የእስልምና ጉዳዮች ከፍተኛ ምክር ቤቱ ጥሪ አቀረበ፡፡

የአማራ ክልል እስልምና ጉዳዮች ከፍተኛ ምክር ቤት ዕሁድ የሚከበረውን 1440ኛው የኢድ አል አድሃ (አረፋ) በዓልን አስመልክቶ መግለጫ ሰጥቷል፡፡

የአማራ ክልል እስልምና ጉዳዮች ከፍተኛ ምክር ቤት ፕሬዝዳንት ሼህ ሰይድ መሐመድ ኡመር 1440ኛው ሂጂራ የኢድ አል አድሃ (አረፋ) በዓል ሲከበር የተቸገሩትን በመርዳት እና ለሀገር ሰላም ፀሎት በማድረግ መሆን እንዳለበት አሳስበዋል፡፡ ሙስሊሙ ማኅብረተሰብ አቅም የሌላቸው እና የተቸገሩ የኃይማኖቱ ተከታዮች በአሉን ተደስተው እንዲያከብሩ የማድረግ ኃማኖታዊና ማኅበራዊ ኃላፊነት እንዳለባቸውም ነው ፕሬዝዳንቱ ያስገነዘቡት፡፡

የእስልምና ኃይማኖት ተከታዮች በሀገሪቱም ሆነ በአማራ ክልል በተከሰተው አለመረጋጋት ከቤት ንብረታቸው የተፈናቀሉ ወገኖችን በመደገፍና ወደ ቀድሞው ህይወታቸው እንዲመለሱ በመርዳት በዓሉን እንዲያከብሩም ሺህ ሰኢድ መሃመድ ኡመር ጠይቀዋል፡፡
ምእመኑ በዓሉን ከሌሎች የኃይማኖት ተከታይ ወገኖቻቸው ጋር በማክበር ለዘመናት የዘለቀውን የአብሮነትና የመተሳሰብ እሴት ማጎልበት ላይ እንዲያተኩሩም ነው ያሳሰቡት፡፡ በዓሉ በባሕር ዳር አለም አቀፍ ስታዬም የሚከበር ይሆናል፡፡ የባሕር ዳር ከተማ ከንቲባን ጨምሮ ሌሎች ተጋባዥ እንግዶችም በሥፍራው ተገኝተው መልዕክት እንደሚያስተላልፉ ይጠበቃል፡፡

ፋሲል ከነማ ከታንዛኒያው አዛም እግር ኳስ ቡድን ጋር ለሚያደርገው ውድድር የአፍሪካ እግር ኳስ ፌዴሬሽን (ካፍ) ስታዲዬሙን ስለተረከበው የስግደት መርሃ ግብሩ እስከ ጠዋቱ 2፡00 ይጠናቀቃል፡፡ በዓሉ በሰላም እንዲከበር ከክልሉ የጸጥታ አካላት ጋር በቂ ዝግጅት ተደርጓል ብለዋል ፕሬዝዳንቱ፡፡ የቤት መኪኖችም ወደ ስታዲዬሙ እንዳይገቡ ተከልክሏል፡፡

አማኞች የመጓጓዣ አገልግሎት እጥረት እንዳይገጥማቸውም ከከተማ አስተዳደሩ ጋር በመነጋገር 10 የሕዝብ ማመላለሻ አውቶቡሶች ተዘጋጅተዋል፡፡ አውቶቡሶቹ ምዕመኑን ወደ ስታዲዬም ወስደው በዓሉ ሲጠናቀቅ ወደ ቤታቸው ይመልሳሉ፡፡
የአማራ ክልል እስልምና ጉዳዮች ከፍተኛ ምክር ቤት ፕሬዝዳንት ሼህ ሰይድ መሐመድ ዑመር በመላው ዓለም ለሚገኙ የእስልምና ኃይማኖት ተከታዮች የእንኳን አደረሳችሁ መልዕክት አስተላልፈዋል፡፡

ዘጋቢ፡-ደጀኔ በቀለ

Image