<> Skip to main content
1440ኛው የኢድ አል አድሐ (አረፋ) በዓል በአረፋት ተራራ፡፡

1440ኛው የኢድ አል አድሐ (አረፋ) በዓል በአረፋት ተራራ፡፡

ባሕር ዳር፡ ነሐሴ 05/2011 ዓ.ም (አብመድ) ከሁለት ሚሊዮን በላይ ሙስሊሞች በሳዑዲ ዐረቢያ አረፋት ኮረብታማ ስፍራ በመሰባሰብ ጸሎት ሲያደርሱ እንደሚውሉ የዘገበው አልጀዚራ ነው፡፡

ከ1ሺህ 4 መቶ ዓመታት በፊት ነብዩ ሙሐመድ የመጨረሻ ስብከታቸውን በፈፀሙበት በዚህ ኮረብታማ ስፋራ ይራመዳሉም፡፡ ነብዩ ሙሐመድ ለእኩልነትና በሙስሊሞች መካከል አንድነት እንዲፈጠር ጥሪያቸውን ያስተላለፉበት ቦታም ነው፡፡ በምድራችን ትልቁ ሃይማኖታዊ መሰባሰብ የሚደረግበት ሥነ-ሥርዓት ነው፡፡ የሀጅ ሁለተኛ ቀን በተጓዦች በኩል የበለጠ ትውስታን የሚያጭር ነው፡፡

ከዓለማችን የተለያዩ ክፍሎች የተሰባሰቡ ሙስሊሞች ነጭ ለብሰው፣ ትክሻ ለትክሻ በመያያዝ የአምላክን ርኅራኄና መባረክ ይጠይቃሉ፤ በሚና ከተማ ድንኳን ውስጥ ያለፈውን ምሽት በጸሎትና በተመስጦ ካሳለፉ በኋላ ማለት ነው፡፡ መንፈሳዊ ተጓዦቹ ነጭ ልብስ የሚለብሱት ከየትኛውም ብሔር ይምጡ የትኛውም ማኅበራዊ ደረጃ (ክብር) ይኑራቸው አንድነትን ለማጉላት ነው፡፡

ቀኑን ሙሉ በአረፋት ተራራ በጸሎት እና በተመስጦ ከዋሉ በኋላ ፀሐይ ጠልቃ ወደ ሚና በመመለስ ሰይጣንን በድንጋይ የመደብደብ ሥርዓት ይፈጽማሉ፡፡ ሥርዓቱ አምላክ ነብዩ ኢብራሂምን ልጁ እስማኤልን እንዲሰዋለት ሲያዝዝ ሰይጣን እንዳይታዘዝ ኢብራሂምን ለማሳመን ከሞከረ በኋላ ኢብራሂም ሰይጣንን በድንጋይ መደብደቡን ተከትሎ የመጣ እንደሆነ በሃይማኖቱ ይገለጻል፡፡ ከሥርዓቱ በኋላ መንፈሳዊ ተጓዦቹ የአራት ቀናት ኢድ አል አድሃ ክብረ በዓል መጀመሩን ለማብሰር እንስሳትን ይሰዋሉ፡፡ 
ሀጅ ከአምስቱ የእስልምና ትዕዛዛት ውስጥ አንዱ ነው፡፡

ከበዓሉ ጋር በተያያዘ ሌላ ዜና በሊቢያ ጦርነት ውስጥ ያሉት ጎራዎች የተባበሩት መንግሥታት ድርጅት ያቀረበውን ጊዜያዊ የኢድ የተኩስ አቁም ጥሪ በመስማማት ተቀብለዋል፡፡ የሊቢያን ርዕሰ ከተማ ትሪፖሊን ለመቆጣጠር ግጭት ውስጥ ያሉ ኃይሎች ናቸው የተኩስ አቁም ለማድረግ መግባባት ላይ የደረሱት፡፡ ስምምነቱ ይፋ የተደረገው ትናንት ቅዳሜ በምሥራቃዊ የሀገሪቱ ከተማ ቤንጋዚ ተሽከርካሪ ላይ የቦምብ ፍንዳታ ተከስቶ ሦስት የተባበሩት መንግሥታት ድርጅት ሠራተኞች መገደላቸውን ተከትሎ ነው፡፡

ገልፍኒውስ በዘገባው እንዳስነበበው ደግሞ በተባበሩት ዐረብ ኤምሬትስ የሚገኙ ነዋሪዎች ከጸሎት አድራሾች ጋር ኢድን ቀደም ብለው አስበዋል፡፡ ክብረ በዓሉ ማኅበራዊ መሰባሰቢያ፣ የልገሳ ጊዜ፣ ስጦታ የመሰጣጠት በዓል እንደሆነ አስነብቧል፡፡ የተባበሩት አረብ ኤምሬትስ መሪዎች የመልካም በዓል ምኞት መልዕክታቸውን እንዳስተላፉም ተነግሯል፡፡ ፕሬዝዳንት ሸህ ካሊፋ ቢን ዘይድ አል ኒህያን መልካም ጤና እና ሀሴትን ለመሪዎች ተመኝተዋል፤ ወደፊት በመራመድ በጥረት እንዲታጀቡና ብልፅግናን ለሙስሊም ሕዝብ እንዲሆን ተመኝተዋል፡፡

የካናዳው ፕሬዝዳንት ጀስቲን ትሩዶም በማኅበራዊ ሚዲያ የኢድ የመልካም ምኞት መልዕክት በካናዳና በመላው ዓለም ለሚገኙ ሙስሊሞች አስተላልፈዋል፡፡ የአሜሪካ ህግ መወሰኛ ምክር ቤት አባል ቤቶ ኦሮርክ በተመሳሳይ በማኅበራዊ ሚዲያ ገፃቸው ለኢድ አል አድሐ ዕውቅና ለሚሰጡ ሁሉ የመልካም በዓል ምኞታቸውን አስተላልፈዋል፡፡

በኢንዶኔዥያ፣ ፊሊፒንስና ሌሎች የዓለማችን ክፍሎችም ሙስሊሞች በጋራ በመሰባሰብ በጸሎት ኢድ አል አድሐ (አረፋ) በዓልን አክብረዋል፡፡

በኪሩቤል ተሾመ

Image