<> Skip to main content
ለወደፊትም የሚታዩ ችግሮች በውይይት ይፈታሉ፡፡

የባሕር ዳር ከተማ የጋጃ መስክ የመስጅድ መሥሪያ ቦታ ጥያቄ ምላሽ ማግኘቱ እንዳስደሰተው የአማራ ክልል እስልምና ጉዳዮች ከፍተኛ ምክር ቤት ገለጸ፡፡

ባሕር ዳር፡ ነሐሴ 05/2011 ዓ.ም (አብመድ) የአማራ ክልል እስልምና ጉዳዮች ከፍተኛ ምክር ቤት በ1440ኛው የኢድ አል አድሐ በዓል አከባበር ላይ ለባሕር ዳር ከተማ የጋጃ መስክ የመስጅድ መሥሪያ ቦታ ጥያቄ የከተማ አስተዳደሩ ለሰጠው ምለሽ ምሥጋና አቅርቧል፡፡

1440ኛው የኢድ አል አድሐ በዓልም በባሕር ዳር ከተማ ተከብሯል፡፡ የአማራ ክልል እስልምና ጉዳዮች ከፍተኛ ምክር ቤት ፕሬዝዳንት ሸህ ሰኢድ ሙሐመድ ‹‹በዓሉ ሲከበር የተቸገሩ የኅብረተሰብ ክፍሎችን በመርዳትና ለሀገር ሠላም በመጸለይ ሊሆን ይገባል›› ብለዋል፡፡ የባሕር ዳር ከተማ የጋጃ መስክን የመስጅድ መሥሪያ ቦታ ጥያቄ ተቀብሎ የከተማ አስተዳደሩ ለሰጠው ምላሽም ምሥጋና አቅርበዋል፡፡ ፕሬዝዳንቱ በአማራጭነት የቀረቡ የአምልኮ ቦታዎች በፍጥነት ተጠቅቀው ካርታ እንዲሰጣቸውም ጠይቀዋል፡፡ በዓሉ በሠላም እንዲጠናቀቅ ያደረጉትን የበዓሉ አዘጋጅ ኮሚቴ እና ከተማ አስተዳድሩን በአማራ ክልል እስልምና ጉዳዮች ከፍተኛ ምክር ቤት ሥም አመሥግነዋል፡፡

የባሕር ዳር ከተማ አስተዳድር ከንቲባ ሙሉቀን አየሁ በበዓሉ የአከባበር ሥነ-ሥርዓት ላይ ተገኝተው የእንኳን አደረሳችሁ መልዕክት አስተላልፈዋል፡፡ በዓሉ የሠላም እና የፍቅር እንዲሆንም ተመኝተዋል፡፡

Image may contain: 1 person

ባሕር ዳር ከተማ ተወዳጅ እንድትሆን ከሚያደርጓት ተፈጥሯዊ ጸጋዎች ባሻገር በነዋሪዎቿ መካከል ተከባብሮ እና ተፈቃቅሮ የመኖር እሴቶች መኖራቸው አንዱ ሀብቷ እንደሆነም ተናግረዋል፡፡ እነዚህ እሴቶች በብሔር፣ በሃይማኖትም ሆነ በባሕል መካከል ያሉ ልዩነቶችን አስታርቀው ለዘመናት በመልካም ጉርብትና ያኖሩ የጋራ መገለጫዎች መሆናቸውንም ነው ያስታወሱት፡፡ እሴቶቹን እንዳለፉት ዘመናት ሁሉ በጋራ መጠበቅ እና ማስቀጠል እንደሚገባም በመልዕክታቸው አሳስበዋል፡፡ በእስልምና ሃይማኖት አስተምህሮ ስለሠላም፣ ስለፍትሕ እና ተቻችሎ ስለመኖር የተቀመጡ ወርቃማ ሕጎች መኖራቸውንም ከንቲባ ሙሉቀን ገልጸዋል፡፡ ይሁን እንጂ ‹‹ተግባራዊነቱ እየቀነሰ በመሆኑ በክልሉ ግጭቶች እና ሰብዓዊ ቀውሶች ማስተናገድ ዕለታዊ ክስተት ሆኗል›› ብለዋል፡፡ ችግሮችን እና መፍትሔዎቻቸውን በሃይማኖታዊ አስተምህሮዎች ጠንከር ብለው እንዲዘልቁ ዑለማዎች ሃይማኖታዊ ኃላፊነታቸውን እንዲወጡም ጥሪ አቅርበዋል፡፡

Image may contain: one or more people, people standing and outdoor

የበዓሉ ታሪካዊ ዳራ የሚያስተምረው መታዘዝን በመሆኑ የእስልምና ሃይማኖት ተከታዮችም የሃይማኖት አባቶቻቸውን ትዕዛዝ መፈጸም እንዳለባቸው አሳስበዋል፡፡ ሁሉንም ማኅበራዊ መስተጋብሮች በሃይማኖታዊ መርሆዎች እና በዑለማዎች ምክረ ሐሳብ መሠረት በማድረግ ለእኩልነት፣ ለሠላምና ለፍትሐዊ ተጠቃሚነት ለመሥራት ሙስሊሙ ኅብረተሰብ በአንድነት እንዲቆምም ጠይቀዋል፡፡

ለረጅም ዓመታት ሲንከባለል የቆየው የጋጃ መስክ የመስጅድ መሥሪያ ቦታ ጥያቄ በመመሪያው መሠረት ውሳኔ እንደተሰጠው በመጠቆም በአጭ ጊዜ ውስጥም የቦታው ባለቤት እንደሚሆኑ እና ሙስሊሙ ኅብረተሰብ ያሉበትን ችግሮች ከተማ አስተዳድሩ እንደሚፈታ ከንቲባ ሙሉቀን ተናግረዋል፡፡ ‹‹ለወደፊትም የሚታዩ ችግሮች በውይይት ይፈታሉ›› ብለዋል፡፡

ዘጋቢ፡- ደጀኔ በቀለ

Image
The website encountered an unexpected error. Please try again later.