<> Skip to main content
1440ኛው የኢድ አል አድሐ (አረፋ) በዓል በሶማሌ ክልል በድምቀት ተከበረ::

1440ኛው የኢድ አል አድሐ (አረፋ) በዓል በሶማሌ ክልል በድምቀት እየተከበረ ነው፡፡

ባሕር ዳር፡ ነሐሴ 05/2011 ዓ.ም (አብመድ) 1440ኛው የኢድ አል አድሐ (አረፋ) በዓል የሶማሌ ክልል መንግሥት ምክትል ርዕሰ መስተዳደር አቶ ሙስጦፋ መሐመድ ዑመር እና የሶማሌ ክልል እስልምና ጉዳዮች ፕሬዝዳንት ሼህ አህመድ ሀዲ በተገኙበት በጅግጅጋ ስታዲዮም በድምቀት ተከብሯል፡፡

በበዓሉ የተገኙት የሶማሌ ክልል ምክትል ርዕሰ መስተዳደር አቶ ሙስጦፋ መሀመድ ዑመር ባለፈው ዓመት በክልሉ የነበረውን አለመረጋጋት አስታውሰው ‹‹ከዚያ ችግር ወጥተን በሠላም እና በፍቅር በዓሉን ለማከበር ስለበቃን እንኳን ደስ ያላችሁ›› ብለዋል፡፡ ምክትል ርዕሰ መስተዳድሩ ‹‹በዓሉን ስናከብር የተቸገሩትን በመርዳት፣ የታመሙትን በመጠየቅ በሠላም እና በፍቅር መሆን ይኖርበታል›› በማለት በስታዲዮሙ ለተገኘው ምዕመን ጥሪ አስተላልፈዋል፡፡

በክልሉ እና በመላው ኢትዮጵያ የነፈሰውን የሠላም ነፋስ ተጠቅሞ ሕዝቡ ከመንግሥት ጎን በመሰለፍ ለልማት፣ ለሠላም እና ለአንድነት በጋር ሊሠራ እንደሚገባም አቶ ሙስጦፋ አሳስበዋል፡፡ የክልሉ መንግሥትም ለወጣቶች የሥራ ዕድል ፈጣራ እና ለሀገር ግንባታ ከመቼውም ጊዜ በላቀ እንደሚሠራ አስታውቀዋል፡፡

የሶማሌ ክልል እስልምና ጉዳዮች ምክር ቤት ፕሬዝዳንት ሼህ አህመድ ሀዲም ሕዝቡ በዓሉን ሲያከብር ሃይማኖቱ በሚዝዘው ልክ ያለውን በማካፈል እና አንድነትን በማምጣት መሆን እንደሚገባ አስገንዝበዋል፡፡ በዓሉን ለማክበር በጅግጅጋ ስታዲዮም የተገኙት ምዕመናንም ባለፈው ዓመት አረፋን ሲያከብሩ በስጋት እንደነበር አስታውሰው የዘንድሮውን የዓረፋ በዓል ያለምንም የፀጥታ ስጋት በማክበራቸው ደስታቸው ከፍ ያለ እንደሆነ ከሶማሌ ክልል የመንግሥት ኮሙኒኬሽን ጉዳዮች ቢሮ ያገኘነው መረጃ ያመለክታል፡፡

ዘጋቢ፡- ታርቆ ክንዴ

Image