<> Skip to main content
በ2009 ዓ.ም ይጠናቀቃል ተብሎ የነበረው አዲሱ የጎንደር ሆስፒታል ሥራው ተቋር

በ2009 ዓ.ም ይጠናቀቃል ተብሎ የነበረው አዲሱ የጎንደር ሆስፒታል ሥራው ተቋርጧል፡፡

ባሕር ዳር፡ ነሐሴ 06/2011 ዓ.ም (አብመድ) ‹‹የጎንደር ዩኒቨርሲቲን ሆስፒታልን ጫና ይቀንሳል፤ በሕክምናው ዘርፍም የዘመነ አገልግሎት ይሰጥበታል›› ተብሎ ተስፋ የተጣለበት ሆስፒታል ግንባታ መቋረጡ ተገለጸ፡፡

በጎንደር ከተማ አስተዳደር አዘዞ ክፍለ ከተማ በ2005 ዓ.ም ግንባታው የተጀመረው ሆስፒታል በተባለለት ጊዜ ካለመድረሱም አልፎ ከመጋቢት ወር መጨረሻ 2011 ዓ.ም ጀምሮ የግንባታ ሥራው መቆሙ ነዋሪዎቹን አሳዝኗል፡፡ ያጋገርናቸው ነዋሪዎች በብቸኛው የጎንደር ዩኒቨርሲቲ ሆስፒታል የነበረውን ጫና እና የታካሚዎችን እንግልት ይቀነሳል ተብሎ ተስፋ የተጣለበት ሆስፒታል በተባለለት ጊዜ አለመጠናቀቅ እንዳሳዘናቸው ተናግረዋል፡፡

‹‹ትልቅ ተስፋ ጥለንበት ነበር›› ያሉት ነዋሪዎቹ ‹‹አሁን ላይ ሥራው መቋረጡ እና ሆስፒታሉ የኔ ባይ በማጣቱ እዝነናል›› ብለዋል፡፡ ነዋሪዎቹ የሕዝብን ሀብት ሜዳ ላይ ጥሎ ዝም ማለትም አግባብነት እንደሌለው አመልክተዋል፡፡ ሆስፒታሉ ተጠቅቆ የተጣለበት ተስፋ እውን እንዲሆን መንግሥት ትኩረት እንዲሰጠው እና የተጀመረው ሥራ እንዲቀጥልም ጠይቀዋል፡፡

በጉዳዩ ላይ ያነጋገርናቸው የአማራ ክልል ጤና ጥበቃ ቢሮ በምክትል ቢሮ ኃላፊ ደረጃ የጤና መሠረተ ልማት አስተባባሪ አቶ ክንዲሁን እገዘው ሆስፒታሉ ግንባታው በ2009 ዓ.ም እንደሚጠናቀቅ ዕቅድ ተይዞለት እንደነበር አስታውሰዋል፡፡ ሆስፒታሉን ለመሥራት ውል በወሰደው ተቋራጭ ላይ በተፈጠረ የገንዘብ እጥረት ሆስፒታሉ እንደተቋረጠም ገልጸዋል፡፡ ‹‹የተቋራጩን የገንዘብ ክፍተት ለመሙላት የተደረገው ጥረት ባለመሳካቱም ሆስፒታሉን በሌሎች አማራጮች ለማሠራት ሥራው እንዲቋረጥ ተደርጓል›› ብለዋል፡፡

a

ከግንባታው አማካሪዎች ጋር ምክክር በማድረግ በሆስፒታሉ የቀሩ ሥራዎችን በመለየት ለልማት ድርጅቶች ለመስጠት ሥራዎች እየተሠሩ እንደሆነ ገልጸው ቢበዛ ከአንድ ወር በኋላ ሥራው ለልማት ድርጅቶች ተሰጥቶ ከተቋረጠበት እንደሚቀጥልም አስታውቀዋል፡፡ ‹‹ሆስፒታሉ ከውጭ የሚመጡ ጥሬ ዕቃዎችን የሚፈልግ፣ በክልሉ ከሚሠሩ ሆስፒታሎች የመጀመሪያው የሆነ ዘመናዊ ሆስፒታል ነው›› ያሉት አቶ ክንዲሁን በሥራው ላይ የጥራት ችግር እንደታየበትም ተናግረዋል፡፡

ሆስፒታሉ ቢቻል በ2012 ዓ.ም አጋማሽ ሥራ እንዲጀምር ካልተቻለ ግን በዓመቱ መጨረሻ ሙሉ ለሙሉ ወደ ሥራ እንዲገባ እንደሚሠራም ገልጸዋል፡፡ ሆስፒታሉ እስካሁን ድረስ 185 ሚሊዮን ብር ፈሰስ ተደርጎበታል፡፡ 80 በመቶ ሥራው እንደተጠናቀቀም ያገኘነው መረጃ ያሳያል፡፡

ዘጋቢ፡- ታርቆ ክንዴ

Image