<> Skip to main content
በ2011 በጀት ዓመት በማዕድን ዘርፉ አምስት ቢሊዮን ብር የሚጠጋ ኢንቨስትመንት

በ2011 በጀት ዓመት በማዕድን ዘርፉ አምስት ቢሊዮን ብር የሚጠጋ ኢንቨስትመንት ተመዘገበ፡፡

ባሕር ዳር፡ ነሐሴ 06/2011 ዓ.ም (አብመድ) በ2011 በጀት ዓመት በማዕድን ዘርፉ 4 ነጥብ 95 ቢሊዮን ብር የኢንቨስትመንት መጠን መመዝገቡን የማዕድንና ነዳጅ ሚኒስቴር አስታወቀ።

ባለፍነው በጀት ዓመት በሚኒስቴሩ በተሰጡ 5 የምርትና 19 የምርመራ ፈቃዶች አዲስ የተመዘገበው የኢንቨስትመንት መጠን 4 ነጥብ 95 ቢሊዮን ብር ሆኗል፡፡ የወርቅ፣ የዕብነበረድ፣ ብረት፣ የከበሩ የጌጣጌጥና ሌሎች ማዕድናት ፍለጋና ልማት ሥራ ላይ የዋለዉ ኢንቨስትመንት ካፒታል 1 ነጥብ 124 ቢሊዮን፣ በነባር 11 የነዳጅ ፍለጋና ልማት ሥራ ስምምነቶች የተፈጥሮ ጋዝ ፍለጋ ለማካሄድ ከ1 ነጥብ 96 ቢሊዮን ብር በላይ በአጠቃላይ 3 ነጥብ 088 ቢሊዮን ብር ኢንቨስት ተደርጓል ነው የተባለው፡፡

እንደ ኢ.ፕ.ድ እስካሁን በኦጋዴን የተገኘውን 6 ነጥብ 3 ትሪሊዮን ኪዩቢክ ጫማ የተፈጥሮ ጋዝ ክምችት ለማልማት ማስተላለፊያ ቧንቧ ዝርጋታ ስምምነት መፈረምና ወደ ሥራ መግባት የኢንቨስትመንት ፍሰቱን በከፍተኛ ሁኔታ እንደሚያሳድገው ይጠበቃል፡፡

በ2011 በጀት ዓመት በኩባንያዎችና በባሕላዊ አምራቾች ለብሔራዊ ባንክና ለውጭ ገበያ ከቀረቡ የተለያዩ ማዕድናት 48 ነጥብ 938 ሚሊዮን የአሜሪካ ዶላር ማስገኘት ቢቻልም መጠኑ ከዕቅዱ አንፃር አነስተኛ መሆኑ ታውቋል፡፡

በዘርፉ በኩባንያዎችና በባሕላዊ ማዕድን አምራቾች ከ179 ሺህ በላይ ለሚሆኑ ዜጎች የሥራ ዕድል መፍጠር መቻሉም ተጠቅሷል፡፡
የአካባቢና ማኅበረሰብ ልማትን በሚመለከት ከዘርፉ አልሚዎች ለማኅበረሰብ ልማት የሚመደብ ገንዘብ 12 ነጥብ 5 ሚሊዮን ብር ገቢ ለማድረግ ታቅዶ ከዕቅዱ ከሁለት እጥፍ በላይ 34 ሚሊዮን ብር ገቢ ማድረግ መቻሉም ተብራርቷል፡፡ አፈጻጸሙ ከዕቅዱ በላይ የሆነበት ምክንያት በኩባንያዎች ላይ ተገቢዉን ክትትል በማድረግ ከዚህ በፊት ሳይሰበሰብ የተወዘፉ ገቢዎች እንዲሰበሰቡ በመደረጉ እንደሆነም ታውቋል፡፡

በ2011 ዓ.ም ያጋጠሙ አገራዊ የፀጥታ ችግሮች ለአልሚ ኩባንያዎች ከፍተኛ ፈተና የሆኑበትና ከባለድርሻ አካላት ማግኘት ያለባቸዉን አገልግሎቶችን ሳያገኙ ከአንድ ዓመት በላይ የተጓተቱ በርካታ ጉዳዮች እንዲኖሩ ማድረጉ፤ ሕገ ወጥና የኮንትሮባንድ ንግድ መስፋፋትም ዋነኛ ችግሮች እንደነበሩም ተገልጿል፡፡

አዳዲስ ኢንቨስትመንቶችን በመሳብና ነባር ፕሮጀክቶችን በማጎልበት ወደ ውጭ የሚላኩ ማዕድናትን በዓይነት፣ በጥራትና በመጠን በማሳደግ የውጭ ምንዛሪ ግኝትና የሥራ ዕድል ፈጠራን ማሳደግ ቀጣይ የትኩረት አቅጣጫዎች ሆነዋል፡፡ በዘርፉ አነስተኛ የሆነውን ሀገራዊ ባለሀብቶች ተሳትፎ ለማሳደግም በልዩ ትኩረት እየተሠራ እንደሆነ ተመላክቷል፡፡

ዘርፉን ወጥ በሆነ መንገድ ለመምራትና ለባለሀብቶች ምቹ ሁኔታን ለመፍጠር የማዕድን እና የነዳጅ ሥራዎች ፖሊሲ የማዘጋጀት እንዲሁም የተለያዩ አዋጆችና ደንቦችን የማሻሻል ሥራዎች መከናወናቸውንም የኢ.ፕ.ድ ዘገባ ያመለክታል፡፡ ተቋማዊ አሠራርን የሚያሻሽልና የማዕድን ፈቃድ አስተዳደሩን ዘመናዊና ግልፅ የሚያደርገው የካዳስተር ሥርዓት መዘርጋቱም ታውቋል፡፡

Image