<> Skip to main content
የርብ ግድብ በመሙላቱ በታችኛው ተፋሰስ ያሉ ነዋሪዎች እንዲጠነቀቁ መልዕክት

የርብ ግድብ በመሙላቱ በታችኛው ተፋሰስ ያሉ ነዋሪዎች እንዲጠነቀቁ መልዕክት ተላለፈ፡፡

ባሕር ዳር፡ ነሐሴ 06/2011 ዓ.ም (አብመድ) በደቡብ ጎንደር መስተዳድር ዞን የሚገኘው የርብ ግድብ የሚጠበቀውን ያህል ውኃ በመያዙ ማስተንፈስ እንዳስፈለገ የርብ ፕሮጀክት ተጠባባቂ ተጠሪ መሐንዲስ አስታወቁ፡፡ ተጠባባቂ ተጠሪ መሐንዲሱ ኢንጂነር አሸብር ቶንጃ ለአብመድ በስልክ እንዳስታወቁት የርብ ግድብ ውኃ መድረስ ከሚጠበቅበት 1 ሺህ 940 ሜትር ከፍታ ላይ እየደረሰ ነው፡፡
የውኃ መጠኑ ከፍ በማለቱ በማስንፈሻው ለመውጣት የ50 ሴንቲ ሜትር ከፍታ ብቻ እንደቀረው የተናገሩት ተጠባባቂ መሐንዲሱ በጉና ተራራና አካባቢው ዛሬ ምሽት ከፍተኛ ዝናብ ከጣለ ውኃው በማስተንፈሻው በኩል ሊወጣ ይችላል፡፡ ስለሆነም በተፋሰሱ ዳርና ዳር የሚገኙ ነዋሪዎች ጥንቃቄ እንዲያደርጉ አሳስበዋል፡፡ 
ከግድቡ አካባቢ መደብ ጉግዳ ቀበሌ አንስቶ እስከ አዲስ ዘመንና ፎገራ ሜዳ ድረስ ያሉ ነዋሪዎች ከፍተኛ ጥንቃቄ እንዲያደርጉ ያሳሰቡት ተጠባባቂ መሐንዲሱ እስከ 10 ኪሎ ሜትር ስኩዬር ድረስ ጎርፉ ሊሸፍን እንደሚችል አስታውቀዋል፡፡

a

የርብ ግድብ 234 ሚሊዮን ሜትር ኩብ ውኃ የመያዝ አቅም አለው፡፡ ተጠባባቂ ተጠሪ መሐንዲሱ እንደገለጹት አሁን ላይ ግድቡ መያዝ የሚችለውን የውኃ መጠን ለመያዝ ተቃርቧል፤ የግድ ማስተንፈስንም የሚጠይቅበት ደረጃ ላይ ደርሷል፡፡

በሊቦ ከምከም እና ፎገራ ወረዳዎች የርብ ወንዝ በመሙላት ጉዳት ማድረሱን መዘገባችን የሚታወስ ነው፡፡

ዘጋቢ፡- አብርሃም በዕውቀት

Image