<> Skip to main content
ወንጀለኞች ሁሉ ለሕግ መቅረብ አለባቸው፡፡

‹‹በወንድማማቾች መካከል የተፈጠረው ግጭት ሀዘኑን እጥፍ ድርብ ያደርገዋል፡፡›› የአማራ ክልል ምክር ቤት

ባሕር ዳር፡ የካቲት 27/2011 ዓ.ም(አብመድ) አማራና ቅማንትን በማጋጨት ሴራ የተሳተፉ ወንጀለኞች ሁሉ ለሕግ መቅረብ እንዳለባቸው የአማራ ክልል ምክር ቤቱ አሳሰበ፡፡

Image may contain: 1 person

የአማራ ክልል ምክር ቤት 5ኛ ዙር፣ 4ኛ ዓመት የሥራ ዘመን 12ኛ መደበኛ ጉባኤ ከየካቲት 26 እስከ 29/2011 ዓ.ም በባሕር ዳር እየተካሄደ ነው፡፡
ምክር ቤቱ ዛሬ የተወያዬባቸውን አንኳር ጉዳዮች በተመለከተ የክልሉ መንግስት ኮሚዩኒኬሽን ጉዳዮች ፅህፈት ቤት ዋና ዳይሬክተር አቶ አሰማኸኝ አስረስ መግለጫ ሰጥተዋል፡፡

የክልሉ ፀጥታ እና ህግ የማስከበር ስራ ከጊዜ ወደ ጊዜ እየተሻሻለ መሆኑን ምክር ቤቱ መገምገሙን በመግለጫቸው አስታውቀዋል፡፡ በማዕከላዊ እና በምዕራብ ጎንደር ዞኖች የተከሰተው የሰው ህይወት መጥፋት እና የንብረት ውድመት እንዳሳዘነው ምክር ቤቱ አስታውቋል፡፡ ግጭቱ ዓላማ የለሽ በመሆኑ አስከፊነቱ የሚያስቆጭ መሆኑን የገለጸው ምክር ቤቱ መሰል ተግባር ድጋሚ እንዳይፈፀም በህዝቡ አማካኝነት የሚደረጉ የሰላም ምክክሮች መጠናከር እንዳለበቸው ወስኗል፡፡

ጥፋት የፈፀሙ ወንጀለኞች ሁሉ ለሕግ መቅረብ እንዳለባቸው ምክር ቤቱ ጠንካራ አቋም መያዙንም አቶ አሰማኸኝ ገልጸዋል፡፡ በግጭቱ የስነ ልቦና እና የአካል ጉዳት የደረሰባቸው ዜጎች እና ተፈናቃዮች በፍጥነት እንዲረዱም ምክር ቤቱ አቅጣጫ አስቀምጧል፡፡

በወንድማማች አማራ እና ቅማንት መካከል የተፈጠረው ግጭት ሀዘኑን እጥፍ ድርብ ያደርገዋል ያለው ምክር ቤቱ በግጭቱ መቃቃር እንዳይኖር በዘላቂነት እርቀ ሰላም እንደሚካሄድም አስታውቋል፡፡

ዘጋቢ፡- ግርማ ተጫነ

Image