<> Skip to main content
‹‹ያለፈው አልፏል ለወደፊቱ ግን መንግሥት ዋስትና ሊሆነን ይገባል፡፡››

‹‹ሳንጣላ እርቅ ፈጽመናል፡፡››

‹‹ያለፈው አልፏል ለወደፊቱ ግን መንግሥት ዋስትና ሊሆነን ይገባል፡፡›› ተፈናቃዮች

ባሕር ዳር፡ ሚያዝያ 04/2011ዓ.ም (አብመድ) ከማዕከላዊ ጎንደር ዞን በግጭቱ ምክንያት የተፈናቀሉ ቤታቸው ያልተቃጠለባቸው ወገኖች ወደቀያቸው እየተመለሱ መሆኑን የማዕከላዊ ጎንደር ዞን አስታውቋል፡፡ በምዕራብ ደምቢያ ወረዳ ጉንትር ቀበሌ ቤታቸው የተቃጠለባቸው ሰዎችም ቤታቸውን ለመሥራት ቦታ ሲለኩ ተመልክተናል።

Image may contain: 1 person, outdoor and nature

የማዕከላዊ ጎንደር ዞን ምክትል አስተዳዳሪና የገቢዎች መምሪያ ኃላፊ አቶ ባንቲሁን መኮንን በዞኑ ካሉ ወረዳዎች ብቻ ሳይሆን ከምዕራብ ጎንደር ዞን ከተለያዩ ወረዳዎች የተፈናቀሉ የኅብረተሰብ ክፍሎች በዞኑ እንደሚገኙ አስታውቀዋል። በአጠቃላይ ከ59 ሺህ በላይ ተፈናቃዮች በዞኑ በተለያየ ሁኔታ ይገኛሉ።

የተፈናቃዮች የጉዳት መጠን እንደሚለያይ እና ቤታቸው ያልተቃጠለባቸው ወደቀያቸው እየተመለሱ መሆኑንም ገልጸውልናል። ለተፈናቃዮቹ የዕለት ዕርዳታ ከማድረግ በተጨማሪ አርሶ አደሮች በመሆናቸው የእርሻ ጊዜያቸው ሳያልፍ ማቋቋም ካልተቻለ በተፈናቃዮችም ሆነ በክልሉ ኢኮኖሚያዊ እንቅስቃሴ ላይ የሚያደርሰውን አሉታዊ ተፅዕኖ ከግምት ውስጥ በማስገባት ወደቀደመ ቀያቸው መልሶ ለማቋቋም እንቅስቃሴዎች ተጀምረዋል። ‹‹ተፈናቃዮችን መልሶ የማቋቋሙ ሂደት ውስብስብ ነው›› ብለዋል ኃላፊው፡፡

Image may contain: 1 person, smiling, outdoor and closeup

ተፈናቃዮች የደረሰባቸው የጉዳት መጠን የተለያየ በመሆኑ ቤታቸው ያልተቃጠለባቸው እና በቀላሉ መመለስ የሚችሉትን የመመለስ ሥራ እየተከናወነ መሆኑንም ለአብመድ ገልጸዋል። ይህ ዜና እስከተጠናቀረበት ጊዜ ድረስ በዞኑ በምዕራብ እና ምሥራቅ ደምቢያ ወረዳዎች እንዲሁም በነባሩ ጭልጋ እና በተወሰነ ደረጃ በጭልጋ ቁጥር አንድ ወረዳ ከ2 ሺህ በላይ አባወራዎች እና 6ሺህ 800 የሚጠጉ የህብረተሰብ ክፍሎች ወደ ቤታቸው መግባታቸውን ተናግረዋል።

በዞኑ አንጻራዊ ሰላም ስላለ ሁሉንም ተፈናቃዮች ድጋፍ በማድረግ በአጭር ጊዜ ለመመለስ እየተሠራ መሆኑንም ገልጸዋል። በቀጠናው የተፈጠረውን የጸጥታ ችግር ለመፍታት እና አስተማማኝ ሰላም እንዲሰፍን ግጭት ቀስቃሾችን ለፍርድ የማቅረብ ጅምር እንቅስቃሴ ተጠናክሮ መቀጠል እንዳለበትም አሳስበዋል።

ከዚህ ተግባር ጎን ለጎን ቤታቸው የተቃጠለባቸው እና ሙሉ ንብረታቸው የወደመባቸውንም ቤታቸውን ሰርቶ ለመመለስ የተጀመሩ እንቅስቃሴዎች መኖራቸውን አብመድ በአንዳንድ አካባቢዎች ተዘዋውሮ ተመልክቷል። በምዕራብ ደምቢያ ወረዳ ጉንትር ቀበሌ ቤታቸው የተቃጠለባቸው ሰዎች ቤታቸውን ለመሥራት ቦታ ሲለኩም ተመልክተናል። እንጨት እየፈለጡና ዝግጅት እያደረጉ መሆኑን አረጋግጠናል።

Image may contain: one or more people, tree, outdoor and nature

የወረዳው የመንግሥት የሥራ ኃላፊዎችም በስፍራው ተገኝተው ድጋፍ እያደደረጉ ነው። ያነጋገርናቸው የአካባቢዎቹ ነዋሪዎችም ‹‹ሳንጣላ እርቅ ፈጽመናል›› ብለውናል፡፡ አሁን በአካባቢው አንጻራዊ ሰላም ስላለ ቤታቸውን ሰርተው ለመግባት እየተንቀሳቀሱ መሆናቸውን ነግረውናል። አስተያየታቸውን ከሰጡን መካከል አቶ ጎሼ ገላየ እና አቶ ደርሶ ዓለሙ ‹‹ያለፈው አልፏል ለወደፊቱ ግን መንግሥት ዋስትና ሊሆነን ይገባል›› ብለዋል።

ዘጋቢ፡-ደጀኔ በቀለ

Image