<> Skip to main content
ከ63 ሺህ የሚበልጡ ሰዎች ወደ ቀያቸው እንዲመለሱ መደረጉ ተገለጸ፡፡

ከ4 ሺህ 500 በላይ ቤቶችን በመስራት ከ63 ሺህ የሚበልጡ ሰዎች ወደ ቀያቸው እንዲመለሱ መደረጉ ተገለጸ፡፡

የአማራ ዲዛይንና ቁጥጥር ስራዎች ድርጅት ሰራተኞች ከተለያዩ አካባቢዎች ተፈናቅለው ለነበሩ ወገኖቻቸው የዕለት ድጋፍ እና መልሶ ማቋቋሚያ የገንዘብ ድጋፍ አድርገዋል፡፡

የድርጅቱ ሥራ አስፈጻሚ አቶ በላይ ዘገዬ ለአብመድ እንደተናገሩት አጠቃላይ ሰራተኞች ከወር ደመወዛቸው ላይ ተቀናሽ በማድረግ 536 ሺህ 348 ብር ድጋፍ አድርገዋል፡፡

ድርጅቱ ደግሞ 1 ሚሊዮን ብር ድጋፍ ማድረጉን ነው ሥራ አስፈጻሚው የገለጹት፡፡  በአጠቃላይም 1 ሚሊዮን 536  ሺህ 348 ብር የያዘ ቼክ ዛሬ ለክልሉ አደጋ መከላከል፣ ምግብ ዋስትና ፕሮግራምና ልዩ ድጋፍ የሚሹ አካባቢዎች ማስተባበሪያ ኮሚሽን አስረክበዋል፡፡ ተፈናቅለው የነበሩ ወገኖች በአስተማማኝ ሁኔታ እስኪቋቋሙ ድረስም የአማራ ዲዛይንና ቁጥጥር ስራዎች ድርጅት እና ሰራተኞች ድጋፋቸውን አጠናክረው እንደሚቀጥሉ አቶ በላይ ተናግረዋል፡፡

በኢትዮጵያ የተለያዩ አካባቢዎች እና በአማራ ክልል በተፈጠረ የሰላም መደፍረስ ምክንያት ከ107 ሺህ በላይ ወገኖች ተፈናቅለው በአማራ ክልል ውስጥ ተጠልለው ነበር፡፡ በምዕራብ እና በማዕከላዊ ጎንደር ዞኖች በነበረው የጸጥታ ችግር ደግሞ ከ6 ሺህ 6 መቶ በላይ ቤቶች ወድመው ከ73 ሺህ በላይ ሰዎችም መፈናቀላቸው ይታወሳል፡፡

የክልሉ አደጋ መከላከል፣ ምግብ ዋስትና ፕሮግራምና ልዩ ድጋፍ የሚሹ አካባቢዎች ማስተባበሪያ ኮሚሽን ምክትል ኮሚሽነር እታገኘሁ አደመ የክልሉ መንግስት ተፈናቃዮችን መልሶ ለማቋቋም ባደረገው ጥረት ከ4 ሺህ 500 በላይ ቤቶችን በመስራት ከ63 ሺህ የሚበልጡ ሰዎች ወደ ቀያቸው እንዲመለሱ መደረጉን ገልጸዋል፡፡

አስተማማኝ ሰላም የሌለባቸው እና ተጨማሪ ስጋት ይኖርባቸዋል ተብሎ በሚገመቱ ቦታዎች ግን እንዲመለሱ ስላልተደረጉ በመጠለያ ውስጥ ሆነው ድጋፍ እየተደረገላቸው ነው የሚገኘው፡፡ ቦታዎቹ አስተማማኝ ሰላማቸው ተረጋግጦ ተፈናቃዮች ወደ ቀያቸው እንዲመለሱ በምክትል ርዕሰ መስተዳድር የሚመራ ኮሚቴ ተሰይሞ እየሰራ እንደሚገኝም ነው ምክትል ኮሚሽነሯ የተናገሩት፡፡ በመሆኑም የመንግስት እና መንግስታዊ ያልሆኑ ድርጅቶች እና ልዩ ልዩ የኅብረተሰብ ክፍሎች ድጋፋቸውን አጠናክረው እንዲቀጥሉ ጥሪ አቅርበዋል፡፡

ዘጋቢ፡-ደጀኔ በቀለ

Image
The website encountered an unexpected error. Please try again later.