በኢኮኖሚ የጠነከረ ሕዝብ ለመፍጠር በሀገር ውስጥ እና በውጭ የሚኖሩ አማራዎች በትብብር እንዲሰሩ የአማራ ክልል የሥራ ኃላፊዎች ጠየቁ፡፡

0
27

የአማራ ሕዝብን ደኅንነት እና ተጠቃሚነት በሚመለከት በማንኛውም መልኩ የሚጠበቅባቸውን እንደሚያደርጉ በአትላንታ እና አካባቢው የሚኖሩ አማራዎች ተናግረዋል፡፡

በክልሉ ኢንቨስትመንት፣ ልማት እና የአማራ አቀፍ ልማት ማኅበር (አልማ) ድጋፍ አንዲሁም በወቅታዊ ጉዳዮች ላይ ትኩረት ያደረገ ውይይት በአትላንታ- ጆርጅያ ዛሬ ተካሂዷል፡፡ ውይይቱ “የአማራ ኅልውና ለኢትዮጵያ ልዕልና” በሚል መሪ መልዕክት ነው የተካሔደው፡፡

በአማራ ዴሞክራሲያዊ ፓርቲ (አዴፓ) ምክትል ሊቀመንበር አቶ ዮሐንስ ቧያለው እና የአማራ ልማት ማኅበር (አልማ) ዋና ሥራ አስፈፃሚ አቶ መላኩ ፈንታ በተመራው ውይይት በአትላንታ እና አካባቢው የሚኖሩ አማራ ባለሀብቶች፣ ምሁራን፣ የማኅበረሰብ አንቂዎች እና ልዩ ልዩ የኅብረተሰብ ክፍሎች ተሳትፈዋል፡፡

የውይይቱ ተሳታፊዎችም በአማራ ተማሪዎች ላይ የሚፈጸመው ግፍ እንዲቆም መሥራት እንደሚገባ፣ ለትምህርት እና ትምህርት ቤቶች ጥራት ትኩረት እንዲሰጥ ጠይቀዋል፤ ለዚህም ተሳትፎ እንደሚያደርጉ ተናግረዋል፡፡ የክልሉን ሰላም እና ጸጥታ ለማሻሻል መሠራት እንዳለበት፣የሕዝቡን አንድነት በማስጠበቅ ወደ ተባበረ ልማት ማሳደግ እንደሚገባ እና የጣና ሀይቅ ደኅንነት ጉዳይም ትኩረት እንዲሰጠው ጠይቀዋል፡፡

በውህድ ፓርቲው ውስጥ የአማራ ሕዝብ ጥያቄዎች እንዴት እንደሚመለሱም ተወያዮቹ ማብራሪያ ጠይቀዋል፡፡

የአዴፓ ምክትል ሊቀመንበር አቶ ዮሐንስ ቧያለው በሰጡት ማብራሪያ የህግ ጥሰት የፈጸሙ አካላት የፍትህ ሥርዓቱን ተከትሎ ተጠያቂ መሆናቸው የማይቀር መሆኑን፣ ለዜጎች ደኅንነት መጠበቅም ህጋዊ እና ፖለቲካዊ መፍትሔዎችን ለመስጠት እየተሰራ እንደሆነ አስረድተዋል፡፡

ውህደቱን በተመለከተ በሰጡት ማብራሪያ ደግሞ በውህድ ፓርቲው እንደ ሌሎች ሁሉ የአማራ ሕዝብ ጥያቄዎችም እንዲመለሱ ትኩረት እንደሚሰጣቸው፣ መዋሃድ ማለትም የሕዝቡን ጥያቄዎች ወደ ጎን መተው ማለት እንዳልሆነ አስገንዝበዋል፡፡ ውህደቱ ዕውነተኛ ፌዴራሊዝምን ለመተግበር የሚያስችል፣ ሕዝብንም የሚያቀራርብ እና በሀገር ጉዳይ ሁሉም የመወሰን ዕድልን የሚሰጥ እንደሚሆንም ነው አቶ ዮሐንስ ያስረዱት፡፡

የጣና ደኅንነት እና ሌሎችም የሕዝብ አጀንዳዎች መፍትሔ እንዲያገኙ ጥረት እየተደረገ መሆኑን፣ ለዚህም በትብብር መሥራት እንደሚገባ አስገንዝበዋል፡፡ በሀገር ውስጥም ሆነ በውጭ ሀገራት የሚኖሩ አማራዎች ጥቃቅን ልዩነቶችን በማቆዬት የጋራ በሚያደርጉ ትልልቅ አጀንዳዎች ላይ በጋራ መሥራት እንደሚገባም መክረዋል፡፡

የአልማ ዋና ሥራ አስፈጻሚ አቶ መላኩ ፈንታ ደግሞ ጠንካራ ተቋማዊ አሠራሮችን በመፍጠር ዘላቂ ጥቅም የሚያስገኙ ተግባራትን ለሕዝቡ ለመሥራት መደጋገፉ አስፈላጊ እንደሆነ ተናግረዋል፡፡ ለዚህም እንደ አልማ፣ የአማራ ባንክ አክሲዮን ማኅበር፣ አማራ ኢንሹራንስ ባሉት እና በሌሎች የኢንቨስትመንት አማራጮች እንዲሳተፉ ለተወያዮቹ ጥሪ አቅርበዋል፡፡ ዋናው ግብም በኢኮኖሚ የጠነከረ ሕዝብ እና ክልል መፍጠር መሆኑን ነው ያስገነዘቡት፡፡ ይህ ሲሆንም የሕዝቡን ኑሮ ማሻሻል ይቻላል ብለዋል አቶ መላኩ፡፡

ለአማራ ሕዝብ ጥቅም እና አንድነት ከአዴፓ እና ከክልሉ መንግስት ጋር እንደሚሰሩ ያረጋገጡት ተወያዮቹ አልማን በዘላቂነት ለመደገፍም ቃል ገብተዋል፤ ለዚህም የአልማ አደራጅ ኮሚቴ መርጠዋል፡፡ በክልሉ ውስጥ ትምህርት ቤቶችን በጋራ በመሆን ለመገንባትም ነው ቃል የገቡት፡፡ የአማራ ሕዝብን ደኅንነት እና ተጠቃሚነት በሚመለከት በማንኛውም መልኩ የሚጠበቅባቸውን እንደሚያደርጉም አረጋግጠዋል፡፡

ቀጣዩ ውይይት ከሁለት ቀናት በኋላ በኦሃዮ – ኮሎምበስ እንደሚካሄድ ይጠበቃል፡፡

ዘጋቢ፦ አስማማው በቀለ – ከአትላንታ- ጆርጅያ

LEAVE A REPLY

Please enter your comment!
Please enter your name here